Porsche-dan xüsusi Macan Turbo
Almaniyanın premial brendi sayılan Porsche kompakt yolsuzluq avtomobili Macan Turbo-nun yeni versiyasını təqdim edib. Exclusive Performance Edition adlanan avtomobil bir sıra nadir yeniliklər alıb ki, onların sayəsində daha cəlbedici olub.
Qeyd edək ki, bəzi ölkələrdə şirkət hələ də Porsche Macan Turbo modelini opsional Performance paketi ilə təklif edir. Təqdim edilmiş avtomobil son dərəcə fərqlidir – belə ki, onun üzərində Porsche Exclusive Manufaktur bölməsinin mütəxəssisləri çalışıblar. Bildirilir ki, yeni elementlərin hamısı əl ilə hazırlanır və quraşdırılır.
Xüsusi kompakt kross Porsche Macan Turbo Exclusive Performance Edition-ın arsenalına 21-düymlük 911 Turbo Design təkər diskləri daxildir ki, onlar parlaq qara millərə malikdirlər.
Porsche Macan Turbo Exclusive Performance Edition 440-güclü 3.6 V6 mühərrikinə malikdir (adi versiyadan 40 a.g. çox). Fırlanma anı isə 600 Nm-dir. Yenilik yerindən 100 km/saata cəmi 4,4 saniyəyə sürətlənir. Mühüm faktlardan biri də odur ki, avtomobil 80 km/saatdan 120 km/saata 2,9 saniyəyə sıçraya bilir. Maksimal sürət isə 272 km/saatdır.
